ډاکټره کبرا حبيب مظهري شاعره، ليکواله او کره کتونکې ده.
کبرا مظهري د مرحوم سید مظهرالحق حسیني لور ده د نسب سلسله یې سید علي ترمذي ته رسېږي چې د نوموتي افغان علمي شخصیت او سیاستوال سید جمال الدین افغان نسبي رشته هم له همدې کورنۍ پورې اړه لري.
د ډاکتر کبرا مظهري مور او پلار دواړه لوستي خلک وه له همدې امله نوموړې درس او تعلیم ته زیاته تشویق او وهڅول شوه. اغلې کبرا په ۱۳۵۰ کال د الائي له لېسې فارغه شوې او د دارالمعلمين له زده کړو وروسته يې لوړې زده کړې په هندوستان کې کړي دي.
لا اتلس کلنه نه وه چې د ننگرهار د خلکو د اعتماد وړ شوه او په ۱۳۴۴ زيږديز کال يې د دوی په غوښتنه ځان شورا ته کانديد کړ. خو د عمر د کموالي له امله، سره له دې چې د بري رايې يې ترلاسه کړې هم وې، شورا ته و نه منل شوه.
کبرا حبيب مظهری د افغانستان د علومو اکاډيمۍ غړې وه او په معارف کې يې هم کار کړی دی. دا د پښتو ادب ته د خدمت تر خوا په مطبوعاتو کې فعاله وه. د علومو په اکاډيمۍ کې د زيري د مجلې غړې او د پوهنې په وزارت کې د عرفان د مجلې مسؤله مديره وه.
ډاکټرې کبرا حبيب مظهري په ډهېلي کې د جامعيه مليه اسلاميه پوهنتون د ماسټرۍ (MA) زده کړو د پروگرام لپاره د بورډ يا د کانکور آزموينې وروسته همدې پوهنتون ته منل شوې او بيا په ۸ د مۍ، ۱۹۹۱ ز. کال کې يې له نوموړي پوهنتون نه د ماسټرۍ بريليک ترلاسه کړی. تر دې وروسته يې د مافوق ماسټرۍ (M.phil) زده کړې د جواهر لال نهرو پوهنتون کې بشپړې کړي او په ۱۹۹۲ ز. کال کې يې خپل بريليک اخيستی. تر هغه وروسته يې د دکتورا (ph.D) تکل وکړ او په ۱۹۹۷ ز. کال کې يې د همدې پوهنتون، د ادبياتو د پوهنځي نه د ادبي کره کتنې په برخه کې خپله دکتورا لاس ته راوړې.
په افغانستان کې د کبرا مظهري گڼ شمېر کتابونه چاپ شوي، چې نوملړ يې دا دی:
1. برېښنا – د افغاني ټولنې په اړه د لنډو کيسو ټولگه
2. سپوږمۍ (ناول) – يو افغانی ناول
3. د زړه وينې – شعري مجموعه
4. لمبې – شعري مجموعه
5. توپاني څپې – شعري مجموعه
6. منزلونه او ټکرونه – شعري مجموعه
7. څو څېړنې – د ليکوالې د بېلابېلو څېړنو ټولگه چې په ملي او نړېوالو سيمينارونو او کنفرانسونو کې وړاندې شوي
8. پښتنې ليکوالې او شاعرانې – په دوه ټوکو کې خپره شوې د پښتني ښځينه شاعرانو او ليکوالانو تذکره
9. په پښتني فرهنگ کې د ښځو د ژوند انعکاس – يو څېړنيز اثر
10. زنده گي و اشعار استاد خليلي – د دري ژبي شاعر خليل الله خليلي ژوندليک
11. نقد اشعار خليلي – د دري ژبې شاعر خليل الله خليلي پر شعرونو کره کتنه
12. شمع از تاريخ معاصر افغانستان –د افغانستان په اړه تاريخي اثر
13. آه – په دري ژبه د نثرونو مجموعه
14. پښتو لنډۍ – په انگرېزي ژبه د پښتو لنډيو په باب څېړنه
15. ډولۍ – په پښتو ژبه د لنډو کيسو ټولگه
16. غوړگه – پښتو ناول
17. اندېښمنه ډالۍ – په پښتو ژبه د نثرونو مجموعه
18. اکو بکو – د ماشومانو لپاره د روزنيزو ادبياتو مجموعه
معلومات؛ د ويکيپيديا او زرلښت له انترنتي پاڼو او شخصي پېژندنې څخه