کیم کؤریبدیر ، ای کونگل اهل جهاندن یخشیلیغ
کیم که آندین یخشی یؤق کؤز توتمه آندین یخشیلیغ
گر زماننی نفی قیلسام، عیب قیلمه، ای رفیق !
کؤرمادیم هر گز نیتایین، بو زماندین یخشیلیغ
دلربادین یمانلیغ کیلدی محزون کونگلومه
کیلمادی جانیمغه هیچ آرام جاندین یخشیلیغ
ایکونگل چون یخشیدین کؤردینگ یمانلیغ آسرو کؤب
ایمدی کؤز توتماق نی یعنی هر یماندین یخشیلیغ
باری ایلگا یخشیلیغ قیلغیل که موندین یخشی یؤق
کیم دیگای لار دهر ارا قالدی فُلاندین یخشیلیغ
یخشیلیغ اهل جهاندین ایستامه « بابر» کبی
کیم کؤروپتور ای کونگل، اهل جهاندین یخشیلیغ
ارسالی : ایماق